ငါးကျမ်းပြန်သာသနာ့ရိပ်သာ၏ နာဂစ်သင့်မိဘမဲ့ကလေးသူငယ်များစောင့်ရှောက်ရေး ရန်ပုံငွေအဖွဲ့
၂၀၀၉ ခုနှစ်အတွက် လစဉ်အလှူငွေများ ထည့်ဝင်ကြရန် မေတ္တာရပ်ခံ
မိုးမခ အထောက်တော် ၀၀၂
ဧပြီ ၂၉၊ ၂၀၀၉
မေလ ၂ ရက်နေ့တွင် နာဂစ်မုန်တိုင်းကြီး တိုက်ခတ်ခဲ့သည်မှာ တနှစ်လည်ခဲ့ပြီ ဖြစ်သည်။ စေတနာရှင်များ၊ ကုသိုလ်ရှင်များက နာဂစ်သင့်ဒုက္ခသည်များကို အခက်အခဲမျိုးစုံကြားက ကိုယ်ထူကိုယ်ထ တယောက်တလက် ကူညီခဲ့ကြသည့်အတွက် ဒုက္ခသည်ပေါင်း သိန်း ၂၀ ကျော်ကို ပထမ ၆ လ အတွင်း တတ်အားသမျှ ထပ်မံ မပျက်စီး၊ မသေပျောက်သွားအောင် စောင့်ရှောက်နိုင်ခဲ့သည်ဟု ဆိုနိုင်ပါသည်။ နောက် ၆ လပိုင်းတို့တွင် အစိုးရအဖွဲ့များ၊ နိုင်ငံတကာအဖွဲ့အစည်းများ၊ လူမှုရေး၊ ကျန်းမာရေးနှင့် ဘာသာရေးအဖွဲ့အစည်းအသီးသီးက ဆက်လက်ပြီး စောင့်ရှောက်မှု၊ ကူညီမှုနှင့် ပြန်လည်ထူထောင်ရေးကဏ္ဍတို့တွင် ၀ိုင်းဝန်းထိမ်းသိမ်း ဆောင်ရွက်ခဲ့ကြသည်ကိုလည်း အထင်အရှားတွေ့ခဲ့ရသည်။
ထိုကဲ့သို့ မိမိတတ်နိုင်ရာရာ ဆောင်ရွက်နေသော စေတနာရှင်၊ ကုသိုလ်ရှင် အစုအဖွဲ့များအနက်က ငါးကျမ်းပြန်သာသနာ့ရိပ်သာက ဗုဒ္ဓဘာသာဆရာတော်များဦးဆောင်သော စေတနာ့ဝန်ထမ်းများက နာဂစ်ကယ်ဆယ်ရေးနှင့် စောင့်ရှောက်ရေးလုပ်ငန်းများကို ပြည်တွင်း ပြည်ပက အလှူရှင်များ၏ ပန့်ပိုးကူညီမှုဖြင့် ဆောင်ရွက်နိုင်ခဲ့သလို နာဂစ်သင့်မိဘမဲ့ကလေးများကို ဇီဝိတဒါန၊ ပညာဒါန၊ အဟာရဒါနတို့ဖြင့် ဆက်လက် မွေးမြူစောင့်ရှောက်ရန် လုံလထုတ် ဆောင်ရွက်ခဲ့ရာ ၂၀၀၈ ခုနှစ်အတွင်း နှစ်ဖက် မိဘမဲ့ကလေးသူငယ်ပေါင်း ၅၆၀ ကို လစဉ် အလှူငွေ တဦးလျင် ကျပ် ၁ သောင်းနှုန်းဖြင့် ကူညီမှုရန်ပုံငွေကို ချမှတ်အကောင်အထည် ဖော်နိုင်ခဲ့ပြီ ဖြစ်သည်။
ထိုကလေးသူငယ်တို့က နီးစပ်ရာ သွေးရင်းသားရင်းမိသားစုများထံတွင် အပ်နှံ၍၎င်း၊ ကျောင်းအိပ် ကျောင်းစားလက်ခံသော ဘုန်းတော်ကြီးကျောင်းများတွင် ပေးပို့၍၎င်း၊ စသည့် အရိပ်အာဝါသတို့တွင် စောင့်ရှောက်ကူညီထားလျက်ရှိရာ ယခု ၂၀၀၉ မေလတွင် နာဂစ်မုန်တိုင်း နှစ်လည်အချိန်ကို အထိမ်းအမှတ်ပြု၍ ယခုနှစ်အတွက် လစဉ်အလှူငွေများ ဆက်လက်ထည့်သွင်း ပေးပို့ကြပါရန် ဆရာတော်များက မေတ္တာရပ်ခံလျက်ရှိကြောင်း သိရှိရသည်။
ရန်ကုန်မြို့ သင်္ကန်းကျွန်းရှိ ငါးကျမ်းပြန်ကျောင်းတိုက်နှင့် အမေရိကန်၊ ဖရီးမောင့်မြို့ မေတ္တာနန္ဒ ကျောင်းတိုက်တို့ကို ဆက်သွယ်ပြီး လှူဒါန်းနိုင်ကြောင်း သိရှိရပါသည်။
0 comments:
Post a Comment